Ginpanindugan sang Department of Foreign Affairs (DFA) ang iya awtoridad nga mag-isyu sang Philippine visa, matapos kwestyunon ni Ombudsman Jesus Crispin Remulla ang legal nga basihan sang amo nga katungdanan kag magpahayag nga sakop ini sang Department of Justice (DOJ).
Suno sa DFA, klaro nga nakasaad sa Administrative Code of 1987 ang gahum sang mga konsulado sang Pilipinas sa pag-isyu sang visa kag indi ini basta lamang nga katungdanan nga gintugyan sang DOJ.
Ginkontra man sang ahensya ang panugyan ni Remulla nga itugyan sa mga pribado nga kompanya ang pagproseso sang visa. Ginpaathag sang DFA nga mahimo magbulig ang mga pribado nga kompanya sa pagbaton kag pagpadali sang mga aplikasyon, apang magapabilin sa gobyerno ang katungdanan sa pag-usisa, pag-aprubar ukon pagsikway sang mga ini.
Sa pihak nga bahin, ginpanindugan man sang DFA ang pagpatuman sang 14-day visa-free entry para sa mga pumuluyo sang China. Suno sa ahensya, gipatuman ini suno sa mando ni Presidente Ferdinand Marcos Jr. agud mapabakod ang patigayun sang negosyo, pagpamuhunan, turismo kag pagbinuligay sang mga pumuluyo sang Pilipinas kag China.
Ini matapos nagguwa ang mga balita nahanungod sa ginapahayag nga pag-abuso sang pila ka dumuluong, ilabi na ang mga Chinese national, sa visa-free entry agud makasulod kag makahimo sang mga ilegal nga buluhaton, lakip ang ilegal nga scam hubs, ilegal nga pagpanarbaho kag mga ilegal nga operasyon sang Philippine Offshore Gaming Operators ukon POGO.
Ginpahayag sang DFA nga kinahanglan usisaon sang mga may katungdanan ang tagsa ka report sang pag-abuso sa visa-free entry. Apang, indi ini nagakahulugan nga may iregularidad sa bahin sang ahensya ukon ilegal ang pagpatuman sang amo nga polisiya.
Ginpanginwala man sang DFA ang mga alegasyon nahanungod sa pag-isyu sini sang peke nga mga pasaporte, korapsyon kag paggamit sang mga serbisyo sang ahensya agud makaganansya.
Gindugang sang ahensya nga ang tanan nga bayad nga ila nabaton ginapatuhoy sa pondo sang gobyerno kag wala ginakabig nga personal nga kinitaan sang mga opisyal ukon empleyado sini.
