Gin-awhag ni Koronadal City Mayor Erlinda Araquil ang mga pumuluyo nga ireport sa barangay officials ukon Philippine National Police (PNP) ang bisan ano nga impormasyon parte sa ginapatihan nga mga insidente sang pagpangawat sa siyudad agud madasig nga maimbestigaran kag maaksyunan sang mga otoridad.
Ini kasunod sang nagalapta nga social media posts parte sa mga ginapatihan nga pagpangawat sa nagkalain-lain nga lugar sa Koronadal City, nga may kaangtanan man sa mga kuha sang CCTV footage.
Sa interview sang Bombo Radyo Koronadal ginpahayag ni Araquil, nga mahimo gamiton ang social media sa pagpaalerto sa publiko, apang ginpabutyag niya nga mas importante nga madiretso ang mga reklamo kag impormasyon sa mga otoridad para sa nagakaigo nga imbestigasyon.
Samtang, ginakonsiderar man ang panawagan nga magbutang sang solar lights sa mga madulom nga lugar nga posible mangin target sang mga kawatan.
Apang suno sa alkalde, kinahanglan ang pagbinuligay sang komunidad kag lokal nga panguluhan bangud indi tanan nga lugar mahimo maasikaso gilayon.
Ginpanawagan ni Araquil ang publiko nga maghalong, magmonitor sang ila palibot kag gilayon magreport sa PNP kon may makita nga makadulu-duda nga tawo ukon insidente.
