Nagahatag sang mas madamo nga oportunidad ang Philippine High School for the Arts (PHSA) sa mga kabataan nga luyag magpauswag sang ila talento sa nagkalain-lain nga patag sang arts paagi sa duha ka curriculum nga ginatanyag sang buluthuan.
Sa interview sang Bombo Radyo Koronadal kay Prof. Josue Greg Zuniega, Director IV kag Head sang PHSA, ginpahayag sini nga dako nga kahigayunan para sa mga kabataan ang programa sang buluthuan nga nagatuyo nga mapauswag ang ila abilidad sa arts kag literatura.
Suno kay Zuniega, madamo na nga graduates sang PHSA ang nagapadayon sa ila tagsa ka talento, lakip ang pagpatindog sang kaugalingon nga mga studio kag pagpartisipar sa nagkalain-lain nga dalagku nga kompetisyon sa sining, pagkanta, pagsaot kag iban pa nga disiplina.
Bangud sini, gin-awhag niya ang mga kabataan nga may hilig kag talento sa arts nga padayon nga maghanas kag magpahimulos sa mga oportunidad nga mahimo makabulig sa ila pag-uswag.
