Nagapati si Retired Judge Lorenzo Balo, Provincial Legal Adviser sang Sultan Kudarat, nga dapat personal nga mag-atubang sa impeachment court sanday Vice President Sara Duterte kag ang iya bana nga si Atty. Manases “Mans” Carpio agud ipaathag ang alegasyon nga sobra sa P800 milyon nga indi maathag nga manggad.
Sa interview sang Bombo Radyo Koronadal, ginpahayag ni Balo nga kinahanglan nga ang mag-asawa mismo ang magsabat sa mga pamangkot sang House prosecution kag mga senator-judges nahanungod sa ginhalinan sang ila manggad.
Lakip sa mga butang nga kinahanglan ipaathag amo ang mga rekord sang ila mga deklarasyon sa Bureau of Internal Revenue (BIR), bank records kag mga dokumento nga may kaangtanan sa Anti-Money Laundering Council (AMLC).
Suno kay Balo, paagi sa personal nga pag-atubang sang mag-asawa, mahatagan sang klaro nga sabat ang mga pamangkot tuhoy sa ila ginapatihan nga wala nade klarar nga mga pagkabutang.
Sa pihak sini, nagalaum si Balo nga mapadasig ang pagpadayon kag pagtapos sang impeachment trial agud mahibaluan na sang publiko ang kamatuoran sa likod sang mga alegasyon.
