Nagalaum ang mga hog raisers sa Polomolok, South Cotabato nga hatagan sang aksyon sang lokal nga panguluhan ang ila panawagan batok sa nagnubo nga farmgate price sang liveweight hogs kag epekto sang imported pork products sa lokal nga industriya.
Sa interview sang Bombo Radyo Koronadal ginpahayag ni hog raiser Amy Jean Jugador, nga gin-imbitar sila sang LGU Polomolok sa dialogue sa Nobyembre 9, 2026, nga pagatambungan sang limitado nga mga lider kag spokesperson sang grupo.
Tatlo ka isyu ang ila luyag nga ipresentar: pagtakda sang floor price sang liveweight hogs, temporaryo nga pagpunggon ukon pagpanubo sang importasyon sang pork products sa sulod sang tatlo tubtob anum ka bulan, kag pagpalig-on sang kampanya nga “Eat Local”.
Ginpahayag ni Jugador nga nagalaum sila nga sundon sang banwa sang Polomolok ang tikang sang Tampakan sa pagpatuman sang executive order para sa floor price sang baboy.
Dugang niya, importante ang suporta sa lokal nga hog raisers agud maprotektahan ang ila pangabuhian kag mapalig-on ang lokal nga ekonomiya. Apang kon wala gihapon sang pagbag-o, posible nga konsiderahon niya ang pag-untat sa pagpangabuhì sang baboy.
