Nagapangatubang sang kalisod kag pagkadulaan sang paglaum ang mga lokal nga mag-aalaga sang baboy sa banwa sang Polomolok bangud sa padayon nga pagnubo sang presyo sang live weight sang baboy.
Sa interview sang Bombo Radyo Koronadal kay Amy Jean Jugador, isa ka lokal nga mag-aalaga sang baboy sa banwa sang Banga, ginpahayag sini nga mabug-at na ang ginabatyag sang iya mga kapareho nga mag-aalaga sang baboy bangud sa nagapadayon nga pagnubo sang presyo sang ila mga alima.
Nagapanawagan man si Jugador sa mga opisyal sang gobyerno nga hatagan sang pagtalupangod ang ila mga reklamo kag mga kabudlayan nga ila ginaatubang sa adlaw-adlaw nga pagpanguma sang baboy. Ginhingyo niya nga tani mabatian ang ila kahimtangan ni Polomolok Mayor Bernie D. Palencia kag South Cotabato Governor Reynaldo S. Tamayo.
Dugang pa niya, daw yara na sa peligro ang palaabuton sang industriya sang pagpamuhi sang baboy sa Polomolok bangud sa padayon nga pagsulod sang karne sang baboy nga ginahalinan sa iban nga pungsod.
Suno kay Jugador, isa ini sa mga ginapatihan nga nagadugang sa pagnubo sang presyo sang live weight, nga nagabalor na lamang sa P90 tubtob P115 kada kilo.
Amo ini ang isa sa pinakamabug-at nga kabudlayan nga ginatubang sang mga lokal nga mag-aalaga sang baboy sa banwa.
