Ginaatubang subong sang mga lokal nga manug-atipan sang baboy sa banwa sang Polomolok ang mas mabudlay nga kahimtangan sa ila pangabuhian bangud sa padayon nga pagnubo sang presyo sang liveweight sang baboy, nga nagresulta sa daku nga kapierdihan sa ila nga pagpangabudlay.
Sa interview sang Bombo Radyo Koronadal kay Amy Jean Jugador, isa ka lokal nga manug-atipan sang baboy sa Polomolok, iya ginpahayag nga mas maayo pa ang baligya-anay sang liveweight sang nagligad nga tuig kon ipaanggid sa subong. Halin sa ₱140 tubtob ₱130 kada kilo sang nagligad nga tuig, yara na lamang sa mas manubo nga kantidad ang presyo sini subong, nga suno sa iya indi na makatarungan bangud indi na makabawi ang mga manug-atipan sang baboy sa ila nagasto.
Ginpahayag ni Jugador nga bisan mag-atipan sila sang baboy nga nagabug-at sang 110 kilos, kag ibaligya ini sa ₱110 kada kilo, indi gihapon sila makakita sang ganansya. Sa baylo, mahimo pa sila nga malugi bangud sa kadakuon sang ila nagasto sa pag-atipan sini.
Dugang pa niya, mas daku ang kapierdihan sang mga manug-atipan nga puro komersiyal nga pagkaon sang baboy ang ginahatag sa ila mga alaga. Nagalab-ot sa ₱15,000 ang ila nagasto sa kada baboy, apang kon ibaligya na ini, yara lamang sa ₱11,000 tubtob ₱12,000 ang ila mabaton. Nagakahulugan ini sang kapierdihan nga nagalab-ot sa ₱3,000 tubtob ₱4,000 sa kada ulo sang baboy.
Bangud sini, nagpanawagan si Jugador sa publiko kag sa gobyerno nga hatagan sang igo nga pagtagad ang mabudlay nga kahimtangan sang mga lokal nga manug-atipan sang baboy, nga bisan adlaw-adlaw nga nagapangabudlay, nagapadayon gihapon sa pag-atubang sang kapierdihan.
Ginpabutyag man niya nga daw yara na sa mabudlay nga kahimtangan ang pagpangabuhi paagi sa pag-atipan sang baboy, gani nagalaum siya nga hatagan sang tion ang ila mga reklamo kag mga problema agud mahimuan sang nagakaigo nga mga tikang kag mabuligan ang mga lokal nga manug-atipan sang baboy nga makapadayon sa ila pangabuhian.
