Ginpahayag sang isa ka tricycle driver sa Koronadal City nga masarangan na ang P1,000 nga badyet para sa ila simple nga handa sa Noche Buena, bisan upod sini ang padayon nga pagsaka sang presyo sang mga balaklon.
Sa interview sang Bombo Radyo Koronadal kay Florentino Matos, tricycle driver, ginpahayag sini nga masarangan na sang P1,000 ang pagbakal sang duha ka bilog nga tinapay kag pansit para sa ila pamilya nga may apat ka katapo.
Dugang pa niya, lain man ang ila ginahanda sa Pasko kag Bag-ong Tuig, bangod karne ang ila ginabakal para sa pagsaulog sang Bag-ong Tuig.
Apang, ginpabutyag man ni Matos ang iya kabalaka sa padayon nga pagsaka sang presyo sang gatong nga nagalab-ot na sa P90 kada litro.
Bisan adlaw-adlaw ang iya pagpamasada, mabudlay gihapon para sa iya nga matabonan ang mga kinahanglanon sang pamilya bangod sa nagataas nga gasto.
