Nagapangabay ang mga prosecutor sang International Criminal Court (ICC) sa Trial Chamber III nga batonon bilang ebidensya ang pila pa ka na-record nga testimonya sang mga testigo sa kaso nga crimes against humanity batok kay anay Presidente Rodrigo Duterte, agud mapadasig ang proseso sang paglilitis.
Lakip sa mga testimonya nga ginahingyo sang prosekusyon nga i-admit bilang ebidensya amo ang nauna nga mga pahayag sang witnesses P-0025 kag P-1382, nga ginakabig nga importante nga ebidensya may kaangtanan sa pila ka insidente sa kampanya kontra iligal nga droga sang administrasyon ni Duterte.
Lakip sa mga insidente nga ginatalakay sa ila testimonya amo ang pagpatay sang mga pulis kay anay Ozamiz City Mayor Reynaldo Parojinog Sr. kag sa 17-anyos nga si Kian Lloyd Delos Santos.
May separado man nga aplikasyon ang prosekusyon para sa pagbaton bilang ebidensya sang mga recorded testimonya nanday witnesses P-0004, P-0014 kag P-1371.
Suno sa mga prosecutor, importante ang mga pahayag sang nasambit nga mga testigo agud mapamatud-an nga sistematiko ang mga pagpatay sa idalom sang administrasyon ni Duterte.
Ginalauman nga magasugod ang paglilitis kay Duterte sa Nobyembre 30.
