Masobra 86,000 ka minimum wage earners sa Region 12 ang makabenepisyo sa ₱41 nga dugang sa ila minimum wage, suno sa Department of Labor and Employment (DOLE) Region 12.
Sa interview sang Bombo Radyo Koronadal, ginpahayag ni DOLE 12 Regional Director Imelda Gatinao nga ginkonsiderar sang National Wages and Productivity Commission ang nagasaka nga presyo sang mga nagapanguna nga kinahanglanon kag ang epekto sini sa pangabuhi sang mga mamumugon sa rehiyon.
Suno kay Gatinao, naglab-ot sa 7.9 percent ang inflation rate sa Region 12, nga nagapakita sang pagsaka sang presyo sang mga balaklon kag serbisyo nga adlaw-adlaw nga kinahanglanon sang mga pamilya.
Antes ginhimo ang desisyon, nagpatigayon ang ahensya sang 12 ka konsultasyon kag public hearings agud mabatian ang mga panugyan kag kabalaka sang mga mamumugon, employers kag iban pa nga sektor.
Ginpaathag man ni Gatinao nga kinahanglan balansehon ang paghatag sang dugang nga sweldo kag ang kapasidad sang mga negosyo nga magpatuman sini, ilabi na nga may yara sang 46,350 ka micro establishments ukon gagmay nga negosyo sa rehiyon.
Suno sa iya, madamo sa mga establisimiento ang nagaatubang man sang pinansyal nga kabudlayan, gani kinahanglan konsiderahon ang ila kapasidad sa paghatag sang mas mataas nga sweldo sa ila mga empleyado.
Dugang pa niya, maid-id nga gintun-an sang Department of Economy, Planning, and Development (DEPDev) ang ₱41 nga wage increase agud makabulig sa mga minimum wage earners nga indi man magresulta sa sobra nga dugang nga gasto para sa mga gagmay nga negosyo.
Ginapaabot nga paagi sa sini nga wage adjustment, mapabalanse ang kaayuhan sang mga mamumugon kag ang pagpadayon sang operasyon sang mga negosyo, samtang malikawan ang posible nga domino effect sa sektor sang negosyo sa rehiyon.
