Ginapabakod sang Department of Energy (DOE), paagi sa Task Force on Energy Resiliency (TFER), ang mga preparasyon agud malikawan ang malapad nga power interruption sa tunga sang ginapaabot nga epekto sang El Niño.
Kabahin sa mga tikang sang ahensya ang pagsiguro nga may backup power systems ang mga importante nga pasilidad kasubong sang mga ospital, health center, water facilities kag food hubs nga makasuporta sang ila operasyon sa sulod sang indi magnubo sa 72 ka oras apisar wala sang suplay halin sa power grid.
Sa koordinasyon man sa National Disaster Risk Reduction and Management Council (NDRRMC), ginapadasig sang DOE ang pagkompleto sang mga importante nga power projects sa idalom sang Task Force 200 agud mapabilin nga bastante ang suplay sang kuryente.
Samtang, ginapadayon man sang ahensya ang O.N.E. ukon Oras Natin sa Efficiency campaign nga nagaluyag magdasig sa publiko nga mangin responsable kag magtipig sa paggamit sang kuryente.
Paagi sa sini nga mga tikang, luyag sang DOE nga maproteheran ang mga importante nga serbisyo kag mapabaskog ang preparasyon sang mga komunidad batok sa posible nga epekto sang El Niño.
