Padayon nga nagalala ang polusyon sa hangin sa Delhi, India, matapos magrekord sang mataas nga lebel sang PM2.5 nga mahimo makasulod sang madalom sa baga kag magresulta sa nagkalain-lain nga balatian.
Yara na sa kategorya nga “Very Poor” ang kalidad sang hangin sa pila ka bahin sang syudad, nga nagahatag sang peligro ilabi na sa mga kabataan, tigulang kag mga may balatian sa respiratory system.
Bangud sini, ginpatuman sang mga otoridad ang Stage II sang Graded Response Action Plan (GRAP), nga nagalakip sang mas masangkad nga paglimpyo sang mga dalan kag mga tikang sa pagkontrol sang paggamit sang mga salakyan agud mapamenos ang polusyon.
Dugang pa sa kabalaka ang nagahilapit nga selebrasyon sang Diwali, isa sa pinakadako nga pista sa India, bangud ginapaabot nga magadugang pa ang polusyon bangud sa paggamit sang fireworks.
Samtang, ginapanawagan ang mga residente nga limitahan ang ila mga aktibidad sa guwa sang puluy-an kag magmonitor sang air quality advisories agud malikawan ang posible nga epekto sang polusyon sa ila panglawas.
