Nagapabudlay sa pag-budget sang adlaw-adlaw nga kita ang padayon nga pagsaka sang presyo sang mga balaklon kag gasolina, suno sa isa ka drayber sang traysikol sa Koronadal City.
Sa interview sang Bombo Radyo Koronadal ginpahayag ni Mark Villanueva, residente sang syudad, nga indi na igo ang ginasiling nga ₱96 nga adlaw-adlaw nga gasto sang isa ka indibidwal, bangud nagalab-ot na sa kapin ₱100 ang iya nagagasto para lamang sa pagkaon.
Dugang pa niya, mabatyagan man ang epekto sang pagsaka sang presyo sang gasolina sa iya pangabuhian. Ang ₱150 nga gasolina nga una nagalawig pa sang pila ka adlaw ukon halos isa ka semana, madali na lamang maubos sa subong.
Bangud sini, nagakabudlay na siya sa pag-budget sang iya kita para mag-igo ang mga kinahanglanon sa sulod sang isa ka bulan kag napilitan pa nga magpangutang tungod sa kakulang sang kwarta.
Sa katapusan, suno sa iya ini nagapakita sang iya eksperyensya sa kabudlayan nga gin-atubang sang mga ordinaryo nga mamumugon, labi na ang mga drayber nga nagasalig sa adlaw-adlaw nga kita kag direkta nga apektado sang pagmahal sang gasolina.
