Mga ka-Bombo, do you wanna build a snowman?
Nagpaka-snowman ang isa ka lalaki sa Poland matapos magpabilin nga nakadikit ang iya bug-os nga lawas sa niyebe sulod sang duha ka oras, 12 minutos kag 12 segundos agud makarekord sa Guinness World Records.
Madinalag-on nga nakab-ot ni Damian Kasprzyk ang titulo nga “Longest Time Spent in Direct Full Body Contact with Snow” sa iya record attempt nga ginhiwat sa Szlachtowa, Poland sang Pebrero 21.
Ikatlo na ini nga madinalag-on nga record attempt ni Damian. Kabilang sa iya mga nauna nga rekord ang full-body contact sa yelo kag pagpabilin sa tuman katugnaw nga tubig.
Suno sa iya, nakabulig ang iya eksperyensya sa trabaho sa Thermo King, isa ka kompanya nga nagahimo sang temperature-controlled transport systems, agud maanad ang iya lawas sa katugnaw.
Nagsugod man ang iya preparasyon paagi sa winter swimming kag ice baths. Apang, ginpabug-atan niya nga indi dapat pag-isipon nga wala sing peligro ang amo nga mga hagit kag importante ang presensya sang medical professionals para sa seguridad.
Para kay Damian, indi lamang titulo ang iya ginahingyo kundi ang pagdiskubre kon tubtob diin ang kapasidad sang lawas sang tawo sa pag-atubang sang tuman nga katugnaw. Determinado man siya nga dugangan pa ang iya mga rekord sa palaabuton.
