Nagadumdom man ang mga pumuluyo sa Sri Lanka sa ila mga himata nga nagtaliwan na paagi sa pagbisita sa mga sementeryo, pagpangamuyo kag pagpreparar sang pagkaon, pareho sa tradisyon nga ginahimo sa Pilipinas.
Sa interview sang Bombo Radyo Koronadal kay Priscilla Rollo Wijesooriya, Bombo International News Correspondent to Sri Lanka, iya ginpahayag nga nagakalain lamang ang duha ka pungsod sa preparasyon sang pagkaon kag iban pa nga kustombre sa pag-obserbar sini nga okasyon.
Suno kay Wijesooriya, kabahin sang ila tradisyon ang paghatag sang pagkaon sa mga imol bangud nagapati sila nga paagi ini sang pagpadumdum kag paghatag sang importansya sa ila mga pinalangga nga nagtaliwan na.
Dugang pa niya, nagapreparar man sang pagkaon ang mga pamilya, nagabisita sa mga sementeryo kag nagaambit sang pagkaon sa mga kaingod kag iban nga pamilya.
Bisan mas madamo ang Budhista sa Sri Lanka kun ikumparar sa mga Kristiyano, ginahatagan man sang tion kag higayon ang mga Kristiyano agud maobserbar ang ila relihiyoso nga mga tradisyon.
Samtang, ginpahayag ni Wijesooriya nga padayon man siya nga nagadumdom sa iya mga himata kag pamilya nga nagtaliwan na bisan yara siya sa iban nga pungsod.
Paagi sa sini nga mga custom kag nakasanayan, nagapati si Wijesooriya nga nagapabilin nga buhi ang pagdumdom sa mga pinalangga nga nagtaliwan na, upod ang pagbinuligay kag pagpaambit sa isigkatawo.
