Nagpadayon ang pagsaka sang Filipina tennis star nga si Alex Eala matapos niya maangkon ang bag-o nga career-high ranking nga No. 17 sa Women’s Tennis Association (WTA) singles rankings, antes ang iya pagpartisipar sa WTA 250 Hong Kong Open.
Base sa pinakabag-o nga opisyal nga ranggo nga ginpagwa sang Lunes, Nobyembre 2, nagsaka si Eala halin sa No. 19 pakadto sa No. 17, nga may kabug-usan nga 2,289 ranking points.
Nalagpasan sini ang iya anay pinakamataas nga ranggo nga No. 18, kasunod sang iya pag-abot sa quarterfinals sang WTA 500 Pan Pacific Open sa Tokyo, Japan.
Ang iya maayo nga performance sa Tokyo naghatag liwat sang pag-uswag sa iya ranggo matapos ang sunod-sunod nga temprano nga pagkadula sa pila ka torneo sa Asian Swing.
Sa iya pagsugod sang kampanya sa Hong Kong Open, magaatubang si Eala sa Amerikanong si Alycia Parks, nga yara sa No. 59 sa kalibutan, sa Martes, Nobyembre 3.
Madumduman nga una nga naangkon ni Eala ang No. 18 nga ranggo sang Agosto 24 matapos ang iya kampanya sa Cincinnati Open. Apang, nagnubo ini sa No. 20 sang Oktubre 19 kasunod sang mga wala ginapaabot nga kapierdihan sa Singapore kag Wuhan Open.
Bisan pa sini, nakabawi ang 21-anyos nga left-handed Filipina sa Tokyo Open, diin nakaabante siya sa quarterfinals kag nagdugang liwat sang importante nga puntos sa iya WTA ranking.
Sa karon, yara na si Eala sa ika-17 nga puwesto sa kalibutan, isa ka bag-o nga milestone sa iya propesyonal nga karera samtang ginatuyo niya nga tapuson ang iya kampanya sa Asian Swing sa Hong Kong sa maayo nga performance.
