Ginbalibaran sang International Criminal Court (ICC) ang request sang mga abogado nga nagarepresentar sa mga biktima nga gamiton ang Tagalog sa pila ka bahin sang ila opening statement sa crimes against humanity nga kaso batok kay anay Presidente Rodrigo Duterte.
Ginhimo ang desisyon sang Trial Chamber III sa ikalima nga pre-trial conference nga ginpatigayon sa The Hague, Netherlands.
Suno kay Presiding Judge Joanna Korner, makahatag sang komplikasyon sa proseso sang korte ang paggamit sang Tagalog, ilabi na sa pag-asikaso sang mga aplikasyon sang mga biktima. Dugang pa, magapataas ini sang gasto bangud kinahanglan pa nga ipa-translate ang mga pahayag.
Ang request ginpahayag ni Public Counsel for Victims Paolina Massidda, nga nagpaathag nga ang paggamit sang Tagalog makabulig agud mas husto kag mas matin-aw nga maipahayag ang mga istorya kag personal nga eksperyensya sang mga biktima.
Gin-athag man ni Massidda nga limitado lamang kuntani ang paggamit sang Tagalog sa pila ka bahin sang opening statement, ilabi na sa mga bahin nga nagakutlo sang direkta nga mga pahayag sang mga biktima.
Samtang, wala nagtambong si Duterte sa nasambit nga conference matapos pag-uyonan sang korte ang request sang iya defense team nga dispensahon siya sa pagtambong sa proceedings.
Suno sa Rome Statute, ang English kag French amo ang opisyal nga mga lenguahe sang ICC.
