Naglab-ot na sa kapin 40 milyon ang kabug-usan nga kadamuon sang mga tawo nga nagbisita sa mga sementeryo, memorial parks kag columbaria sa bug-os nga Pilipinas sa pagsaulog sang Undas 2026.
Base sa datos sang Philippine National Police (PNP), kapin 40 milyon ka bisita ang na-record sa 5,311 ka sementeryo sa pungsod halin Oktubre 30 tubtob sa aga sang Nobyembre 2.
Sa tunga sang pagdagsa sang mga pamilya nga naghatag pasidungog kag nagdumdom sa ila mga napatay nga hinigugma, padayon naman nga nagabantay ang mga kapulisan sa mga sementeryo kag iban pa nga matawo nga lugar agud maghatag sang bulig kag masiguro ang kalinong kag kahapsay.
Samtang, naglab-ot naman sa 6,499 ka ginadumilian nga mga gamit ang nakumpiska sang kapulisan sa nagkalain-lain nga bahin sang pungsod.
Lakip sa mga ini ang mga matalom nga armas, makahulubog nga ilimnon, lighter, sigarilyo kag vape products, mga kagamitan sa pagluto kag nagakalayo nga mga materyales.
Suno kay PNP Chief Police General Jose Melencio C. Nartatez Jr., wala lamang nagapokus ang kapulisan sa pagmintinar sang seguridad kundi handa man sila nga maghatag sang bulig kag pag-alalay sa mga pamilya nga nagabisita sa mga lulubngan sa sini nga Undas 2026.
