Ginapanawagan sang House prosecution si Bise Presidente Sara Duterte nga ipaathag ang ginhalinan sang iya manggad matapos makita ang ginapatihan nga indi pagtupong sang balor sang iya mga pagkabutang sa mga kantidad nga nakarekord sa iya Statement of Assets, Liabilities and Net Worth ukon SALN.
Suno kay House prosecution legal spokesperson kag private prosecutor Atty. Benjamin “Jay” Tolosa Jr., indi bastante ang simple nga pagpanginwala sang depensa sa mga alegasyon, kundi kinahanglan ipaathag kun paano nakuha ang mga natukiban nga manggad kag ngaa indi ini tanan nalakip sa SALN sang Bise Presidente.
Base sa forensic accounting analysis ni Alexander Cabrera, nagalab-ot sa indi magnubo sa P817.87 milyon ang ginapatihan nga wala nadeklarar kag indi maathag nga manggad nanday Duterte kag sang iya bana nga si Manases Carpio halin 2022 tubtob 2025.
Posible pa ini nga mag-abot sa P1.5 bilyon depende sa pagkwenta sang ila mga utang kag buhis.
Sa pihak sini, nagdeklarar si Duterte sang P98.66 milyon nga net worth sa iya 2025 SALN.
Dugang pa ni Tolosa, ikumparar man sang prosecution ang mga natukiban nga manggad sa kinitaan sang Bise Presidente nga ginreport sa Bureau of Internal Revenue ukon BIR.
Samtang, natapos na sang House prosecution ang presentasyon sang ebidensya para sa Article II matapos bawi-on ang tatlo pa ka impeachment articles nga may kaangtanan sa confidential funds, grave threats kag bribery.
Gilauman nga sugdan sang depensa ang presentasyon sang ila mga ebidensya sa Nobyembre 9, sa pagpadayon sang impeachment trial. Ang Senado bilang impeachment court ang magadesisyon kun bastante ang mga ebidensya agud mapamatud-an ang nabilin nga mga alegasyon.
