Preparado na ang Golden Valley II Memorial Gardens sa pagbaton sang madamo nga mga bisita sa pagsaulog sang Todos los Santos sa Nobyembre 1 kag Kalag-kalag sa Nobyembre 2.
Sa interview sang Bombo Radyo Koronadal kay Jean Balibao, in-charge sang Golden Valley II Memorial Gardens, iya ginpahayag nga padayon ang ila preparasyon agud masiguro ang hapsay kag malinong nga pagbisita sang publiko sa nasambit nga mga inadlaw.
Suno kay Balibao, kabahin man sang ila preparasyon ang padayon nga pagbantay kag pagmonitor sang mga otoridad sa palibot sang memorial gardens agud masiguro ang seguridad sang tanan.
Bangud sini, gin-awhag niya ang publiko, ilabi na ang mga nagaplano nga magbisita, nga kun mahimo magkadto na lamang sing temprano agud malikawan ang mabug-at nga pagdagsa sang mga tawo.
Ginpahanumdom man ni Balibao ang mga bisita nga ginadumilian ang pagdala sang mga matalom nga butang pareho sang kutsilyo kag makahulubog nga ilimnon sa sulod sang sementeryo.
Dugang pa sini, ginpangabay man niya ang tanan nga mangin responsable sa pagdumala sang ila mga basura agud mapabilin nga matinlo kag mahapos ang palibot sang memorial gardens sa bilog nga selebrasyon.
