Nagpanawagan si Atty. RJ Sustiguer, presidente sang South Cotabato Chamber of Commerce and Industry, sa gobyerno nga hugtan ang fiscal discipline kag magpatuman sang epektibo nga mga tikang agud mapahagan-hagan ang epekto sang inflation.
Sa interview sang Bombo Radyo Koronadal, ginpahayag ni Sustiguer nga indi bastante ang panawagan nga indi magpanic ang publiko, kundi kinahanglan ang klaro nga plano sa pagdumala sang nagataas nga presyo sang mga balaklon.
Ginduso niya ang pagrepaso sang non-essential nga paggasto sang gobyerno agud mahatagan sang suporta ang Micro-, small, and medium-sized enterprises ukon MSMEs, minimum wage earners kag mga nagatrabaho nga propesyonal.
Dugang man niya ang pagpatuman sang mga infrastructure project nga may klaro nga benepisyo sa publiko kag makahatag sang trabaho.
Gindugang pa niya, kinahanglan mapalig-on ang lokal nga agrikultura agud buhinan ang pagsalig sa imported nga mga produkto, ilabi na sa bugas kag iban pa nga nagapanguna nga balaklon.
Ginpanawagan man niya ang pagpauswag sang manufacturing sector paagi sa klaro nga industrial policy nga makapadasig sang lokal nga produksyon kag makadugang sang oportunidad sa negosyo.
Suno kay Sustiguer, kinahanglan sang nagadugay nga mga polisiya agud maatubang ang inflation, pagbag-o sang foreign exchange rates kag internasyonal nga economic uncertainties, samtang ginaprotektaran ang lokal nga ekonomiya kag pangabuhian sang mga pumuluyo.
