Nagapati si South Cotabato Vice Governor Arthur Pingoy Jr. nga dapat manabat ang Department of Agriculture (DA) kon may kakulangan ukon sayop sa pag-estimate sini sa produksyon sang lokal nga baboy nga mahimo makadugang sa kabudlayan nga gin-atubang sang mga backyard hog raiser.
Suno kay Pingoy, indi dapat pasagdan nga ang mga lokal nga magbababoy lamang ang mag-antos sa epekto sang mga desisyon ukon sayop nga pagbanabana sang ahensya, ilabi na kon ini ang may kaangtanan sa suplay kag presyo sang buhi nga baboy sa merkado.
Dugang pa sang bise gobernador, kon mapamatud-an nga ang sayop nga pag-estimate sang produksyon sang lokal nga karne sang baboy ang nangin kabangdanan sang problema sa industriya, dapat manabat ang mga responsable sa ahensya.
Gindugang niya nga kon ang mga desisyon sang DA nagahatag sang prayoridad sa mga negosyante sa baylo nga maprotektahan ang lokal nga mga mangunguma kag hog raiser, kinahanglan nga magbaton man ini sang responsibilidad sa epekto sang ila mga desisyon.
Para kay Pingoy, kinahanglan nga may yara sang accountability sa mga desisyon sang gobyerno agud indi padayon nga mabutang sa alanganin ang pangabuhian sang mga lokal nga backyard hog raiser kag ang industriya sang pagpamababoy sa pungsod.
