Nagapabilin ang paglaum sang Pilipinas sa kampanya ni tennis star Alexandra “Alex” Eala sa 2026 Toray Pan Pacific Open matapos ang impresibo nga pagbalik niya sa hampang batok sa Australian nga si Talia Gibson.
Bisan napierdi sa una nga set, wala nagpadaog si Eala kag nagbangon agud tapuson ang laban sa iskor nga 4-6, 6-2, 6-0.
Paagi sa iya determinasyon kag pagpabilin nga nakapokus, nasiguro sang 21-anyos nga Pinay ang puwesto sa quarterfinals sang torneo sa Tokyo.
Apang mas mabudlay nga pagsulay ang nagahulat sa iya, bangud magaatubang naman siya kay Russian tennis player Diana Shnaider, nga yara sa ika-13 nga ranggo sa kalibutan.
Dugang pa nga may daan na sila nga kasaysayan sa korte. Sa ila nagligad nga paghampang sa Ningbo Open sa China, nagdaog si Shnaider kontra Eala sa iskor nga 7-5, 6-4.
Bangud sini, may kahigayunan si Eala nga makabawi sa ila liwat nga pag-atubang kag ipakita nga ang iya pag-uswag sa Tokyo indi basta swerte lamang.
Sa iya pagdaog kay Gibson, ginpabug-atan ni Eala nga importante ang indi pagsurender bisan mabudlayan sa umpisa sang hampang.
Ang amo nga pamatasan mahimo nga mangin dako nga advantage niya sa pag-atubang kay Shnaider.
Ang quarterfinal match yara sa iskedyul sa Biyernes, Oktubre 30. Nagalaum ang mga Pilipino nga mapadayon ni Eala ang iya momentum kag makasulod sa semifinals sang prestihiyoso nga WTA 500 tournament.
