Nagatubang sa madamo nga isyu kag problema ang Committee on Agriculture sang Sangguniang Panlalawigan sang South Cotabato bangud sa malapad nga sakop sang ila talatapan, ilabi na sa nagadaku nga kabudlayan sang lokal nga industriya sang pag-alima sang baboy.
Sa interview sang Bombo Radyo Koronadal, ginpahayag ni Board Member Nilda Almencion, chairperson sang nasambit nga komite, nga isa sa ila mga tikang amo ang paglibot sa 10 ka munisipalidad kag isa ka syudad sa probinsya agud makig-angot sa mga kooperatiba kag asosasyon sang lokal nga hog raisers kag personal nga mabatian ang ila mga problema kag panginahanglan.
Suno kay Almencion, sang bulan sang Hulyo ukon Agosto, nagpasa sang petisyon ang asosasyon sang hog raisers nga nagapanawagan sang pagpatuman sang executive order para sa pag-regulate sang presyo sang baboy, pagpahunong sang importasyon sang karne sang baboy, kag paghatag sang livelihood programs para sa mga lokal nga mag-uuma sang baboy.
Dugang pa niya, nagpatawag man ang iya talatapan sang miting kaupod ang asosasyon sang hog raisers sang Agosto agud mapabutyag sang mga ini ang ila mga reklamo kag kabalaka, nga ginbaton kag gin-atubang sang komite.
Padayon naman ang pagpakig-angot sang talatapan sa mga lokal nga hog raisers agud matumod ang mga tikang nga mahimo makabulig sa ila pangabuhian kag sa pagpalig-on sang industriya sang baboy sa probinsya.
