Paghangop, respeto kag sinsero nga pagserbisyo sa mga nagakasubo nga pamilya amo ang ginpabutyag ni Martin Cabardo, isa ka embalsamador kag kabahin sang pagdumala sang isa ka funeral home sa syudad sang Koronadal, sa iya sobra tatlo ka dekada nga eksperyensya.
Sa interview sang Bombo Radyo Koronadal, ginpahayag ni Cabardo nga nagumpisa ang ila negosyo sang 1991 kag nakuha niya ang lisensya bilang embalsamador sang 1993, matapos niya maeksperyensyahan ang ubra sa Santa Barbara, Iloilo kung sa din sya nakatuon kag naggradwar.
Suno sa iya, isa sa pinakamabudlay nga bahin sang propesyon amo ang pag-atipan sang mga patay nga lawas nga malawig na nga napatay kag may mabaskog nga baho.
Nagadepende man sa kondisyon sang lawas ang kadugayon sang pag-embalsamo agud masiguro nga maayong mapreparar ini antes ipakita sa mga himata.
Ginpahayag man ni Cabardo nga wala pa siya nakaeksperyensya sang paranormal activity sa iya trabaho.
Dugang niya nga ang pag-embalsamo indi lamang parte sang preparasyon sang napatay, kundi isa man ka serbisyo nga nagakinahanglan sang respeto kag paghangop sa kasubo sang pamilya, sa baylo nga kwarta lamang ang mangin rason sa pagserbisyo.
