Ginpaathag ni Ramil Isogon, Bombo International News Correspondent sa The Hague, Netherlands, ang hugot nga mga pamaagi sa seguridad nga kinahanglan agyan sang mga bisita antes makasulod sa headquarters sang International Criminal Court (ICC), diin ginadumala ang kaso batok kay anay Presidente Rodrigo Duterte.
Sa interview sang Bombo Radyo Koronadal, ginpahayag ni Isogon ang iya eksperyensya sa pagsulod sa pasilidad, lakip ang pagpresentar sang balido nga identification, verification sang identidad, kag pagkuha sang visitor’s ID.
Antes makasulod, kinahanglan anay magpakig-angot ang bisita sa receptionist kag security personnel.
Sunod diri ang security screening nga kaangay sang ginapatuman sa mga airport, diin ipaagi sa X-ray machine ang mga dala nga gamit, lakip ang bag kag cellphone.
Ginpahayag man ni Isogon nga may mga bahin sang pasilidad nga may restriksyon sa pagkuha sang laragway kag video, gani kinahanglan sundon ang mga panugyan sang security personnel.
Ang ICC sa The Hague amo ang lugar diin ginapadalagan ang kaso batok kay anay Presidente Rodrigo Duterte nga may kaangtanan sa mga alegasyon sang krimen batok sa katawhan nga nag-ugat sa kampanya kontra droga sang iya administrasyon.
Sang Setyembre 16, 2026, personal nga nagtambong si Duterte sa preparatory hearing sang ICC, nga nagtalakay sa mga preparasyon kag iskedyul antes magumpisa ang iya trial sa Nobyembre 30.
Sang Oktubre 13, nagtambong naman siya sa ikaapat nga status conference sang kaso.
