Wala sang Pilipino nga na-report nga nasamaran sa pinakabag-o nga pag-atake sa King Fahd International Airport sa Dammam, Saudi Arabia, suno kay Migrant Workers Secretary Hans Leo Cacdac.
Sa interview sa dzMM radio, ginpahayag ni Cacdac nga padayon nga ginabantayan sang gobyerno ang sitwasyon agud masiguro ang kaluwasan sang mga Pilipino nga yara sa nasambit nga lugar.
Suno sa Saudi Civil Aviation Authority, isa ang napatay samtang walo ang napilasan sa pag-atake nga nagluntad sang Miyerkules sang gab-i.
Samtang, nagapabilin nga ginabantayan sang Department of Migrant Workers (DMW) ang kahimtangan sang pito ka Pilipino nga nasamaran sa missile attack sa King Khalid International Airport sa Riyadh sang Oktubre 11.
Sa pito, tatlo ang una nga yara sa kritikal nga kahimtangan kag gin-admit sa intensive care unit (ICU). Base Base sa update sang DMW, duha sa ila ang nabalhin na sa regular ward kag nagapakita sang pag-ayo sang ila kondisyon.
Sang Oktubre 20, ang ikatlo nga Pilipino nga yara sa kritikal nga kahimtangan padayon pa nga ginabulong sa ICU. Ginapasiguro sang mga awtoridad nga padayon ang pagmonitor sa sitwasyon kag sa seguridad sang mga Pilipino sa Saudi Arabia sa tunga sang nagakatabo nga mga pag-atake.
Sa karon, wala pa nag-angkon sang responsibilidad ang grupong Houthi sa nasambit nga insidente, bisan pa nga ang amo nga airport ang una na nga gintarget sa asod-asod nga missile strikes.
