Ginapahayag sang Titans Hog Raiser Association nga 50 porsyento sa ila mga miyembro sang nagbaligya na sang ila mga hinuptan nga baboy bangud sa daku nga kaperdihan nga ila naeksperyensyahan tungod sa padayon nga pagnubo sang presyo sang buhi nga baboy sa merkado.
Sa interview sang Bombo Radyo Koronadal kay Arnel Baroso, presidente sang Titans Hog Raiser Association, iya ginpabutyag nga sobra na sa isa ka tuig nga ginabatyag sang mga hog raisers ang kabudlayan sa ila pangabuhian bangud sa padayon nga pagnubo sang presyo sang buhi nga baboy.
Suno kay Baroso, nagalab-ot sa P25 milyon kada adlaw ang ginapatihan nga kaperdihan sang mga magbababoy, sa diin dugang nga nagapabug-at sa kahimtangan sang lokal nga industriya sang baboy.
Bangud sini, ginapanawagan sang mga hog raisers nga ipatuman ang ila ginaproponer nga presyo nga nagaabot sa P160 tubtob P180 kada kilo sang buhi nga baboy agud mabuligan sila nga makabawi sa ila mga nagasto sa pag-atipan kag pagpadako sang mga alagahon.
Mabaskog man nga ginapanawagan ni Baroso sa gobyerno nga untaton na ang importasyon sang baboy kag hatagan sang mas dako nga importansya ang mga lokal nga magbababoy.
Suno sa iya, kinahanglan ang konkreto nga mga tikang agud maproteheran ang lokal nga industriya kag malikawan nga madugangan pa ang mga hog raisers nga mapilitan sa pagbaligya sang ila mga baboy bangud sa padayon nga kaperdihan.
Ginapaabot sang mga hog raisers nga matalupangdan sang gobyerno ang ila panawagan kag makapatuman sang mga solusyon nga makabulig sa pagpasanyog sang presyo sang buhi nga baboy kag sa pagpadayon sang ila pangabuhian.
