Gin-awhag sang Philippine Red Cross (PRC) South Cotabato Chapter ang publiko nga magpartisipar sa palaabuton nga Dugong Bombo 2026 sa Nobyembre 14, 2026, sa KCC Mall of Marbel agud makabulig sa pagluwas sang kabuhi paagi sa boluntaryo nga pagdonar sang dugo.
Sa interview sang Bombo Radyo Koronadal, ginpabug-atan ni Erwin Rommel Del Carmen, RMT, Chapter Administrator sang PRC South Cotabato Chapter, ang importansya sang blood donation, ilabi na para sa mga pasyente nga nagakinahanglan sang blood transfusion bangud sang emerhensya, operasyon, kag nagkalain-lain nga medikal nga kondisyon.
Suno kay Del Carmen, dako nga bulig ang boluntaryo nga pagdonar sang dugo agud masiguro nga may bastante nga suplay ang mga ospital para sa mga pasyente nga nagakinahanglan sini.
Kaangot sini, ginpangabay niya ang publiko nga mag-upod sa Dugong Bombo 2026 kag magboluntaryo sa pagdonar sang dugo, bangud ang isa ka donasyon mahimo makabulig sa pagluwas sang kabuhi.
Ginpahanumdom man niya nga paagi sa pagdonar sang dugo, ang tagsa ka indibidwal may kahigayunan nga makabulig sa mga pasyente kag makahatag sang paglaum sa ila kag sa ila mga pamilya.
