Gilayon nga nagresponde ang lokal nga gobyerno sang Tantangan, South Cotabato sa masobra 20 ka pamilya nga apektado sang pagbaha sa dulunan sang Barangay New Iloilo kag Barangay Libas, kasunod sang mabaskog nga pagbunok sang ulan.
Sa interview sang Bombo Radyo Koronadal, ginpahayag ni Tantangan Mayor Timee Torres Gonzales nga gilayon nga naghatag sang bulig ang Municipal Disaster Risk Reduction and Management Office (MDRRMO) kag Municipal Engineering Office agud ipatigayon ang clearing operations sa apektado nga lugar.
Suno sa alkalde, ang mabaskog nga ulan kag pagdaludo sang tubig halin sa kabukiran amo ang nagtuga sang pagbaha kag halit sa mga residente sang nasambit nga mga barangay.
Ginpahayag man ni Gonzales nga padayon ang mga tikang sang lokal nga gobyerno agud masolusyunan ang problema sang pagbaha sa banwa.
Samtang, ginpaathag niya nga ang pagbaha sa bahin sang Barangay Bukay Pait may kaangtanan sa nagapadayon nga konstruksyon sang flood control projects sa national highway.
Sa pihak sini, ginpangabay sang alkalde sa publiko nga magpadayon sa pagsalig sa gobyerno, bisan pa sang nagaluntad nga mga isyu sang korapsyon kag mga alegasyon sang iregularidad sa flood control projects nga nagadalahig sa pila ka opisyal sang gobyerno.
