Ginpaathag sang aktres kag beauty queen nga si Bianca Manalo nga wala siya makahibalo kun ngaa padayon nga nadalahig ang iya ngalan sa mga espekulasyon nga may kaangtanan sa third-party issues, bisan pa nga single siya kag wala nagaplano nga magdali sa pagsulod liwat sa isa ka relasyon.
Ginpahayag ni Manalo ang mga alegasyon nga nag-angot sa iya sa iban nga personalidad, lakip na ang aktor nga si Rob Gomez kag si Jonathan Sterling, ang anay partner ni Celeste Cortesi.
Sang ginpamangkot kun ngaa nagabalik-balik ang iya ngalan sa mga alegasyon sang third party, nagsabat si Manalo nga indi niya maintiendihan ang rason, kag bisan subong nga single siya, madamo gihapon siya nga nabatian nga mga istorya bahin sa iya.
Naglahog pa ang aktres nga basi kinahanglan na niya nga magsulod liwat sa isa ka relasyon agud untatan na ang pag-angot sa iya sa nagkalain-lain nga personalidad.
Apang gin-athag niya nga wala siya magapangita sang nobyo bangud lang sa mga espekulasyon sang publiko.
Suno kay Bianca, kontento siya sa iya kahimtangan sa subong kag wala nagadali nga magka-relasyon liwat.
Ginapili niya nga igahin ang iya tion sa iya pamilya, ilabi na sa iya iloy, mga utod, kag mga hinablos.
Apisar sini, magpasalamat man siya sa mga tawo nga nagapabilin nga nagasuporta sa iya kag nagapati sa iya bahin sang istorya.
Madumduman nga sang Hunyo, ginpanginwala na ni Manalo ang mga huring-huring nga nalambigit siya sa relasyon sang iban nga magpartner.
Samtang, ginpahayag man ni Manalo sa amo nga interview nga maayo gihapon ang ila pag-abyanay sang iya anay nobyo nga si Senate President Sherwin Gatchalian matapos ang ila pagbulagay kah padayon man niya nga ginasuportahan ang pagserbisyo sini sa publiko.
