Nakaluwas ang 16 ka tawo matapos gin-rescue sang US Coast Guard sa Pacific Ocean, kasunod sang paglugdang sang isa ka sakayan 225 kilometro sa Ensenada, Mexico.
Nagresponde ang US Coast Guard sang Biyernes matapos makabaton sang Mayday call nga nagapaathag nga naglugdang ang sakayan.
Samtang, nag-abot ang rescue helicopter mga duha ka oras matapos ang panawagan sang bulig, suno kay Coast Guard Lieutenant Santiago Tamburini.
Suno sa report, nagkinahanglan sang 90 minutos ang mga rescuer agud maluwas ang 16 ka tawo halin sa tubig, nga lunsay mga Mexican national.
Matapos ang rescue operation, gilayon naman nga ginhatang pagbulong ang isa sa mga naluwas bangud sa ginapatihan ginkagat sang bagis, samtang duha ang yara sa kritikal nga kondisyon.
Gilayon sila nga ginsakay sa helicopter kag gindangat San Diego, California, agud mahatagan sang medikal nga pagbulong.
Nagapadayon ang pagpangita sang US Coast Guard kag US Navy gamit ang mga helicopter, eroplano kag barko.
Sa kasamtangan, wala pa sang klaro nga impormasyon parte sa ginhalinan kag padulungan sang sakayan, nga naglugdang sa lugar nga ginapatihan ginagamit man nga ruta sang pagpalusot sang mga migrante pakadto sa Estados Unidos.
Sa karon, nagapadayon ang pagpangita sa 11 ka tawo nga ginapatihan missing.
