Nagaplano ang lokal nga gobyerno sang Koronadal City nga magpatuman sang mobile clinic agud mapalapit ang serbisyo medikal sa mga pumuluyo, ilabi na sa mga nagaistar sa malayo nga mga barangay.
Suno kay Mayor Erlinda “Bing” Araquil, paagi sa sini nga inisyatibo, mas mahapos nga makakuha sang basic nga medical service kag eksaminasyon ang mga pumuluyo nga wala na kinahanglan magbiyahe pa kag maggasto sang dugang para sa plete.
Dugang man sang alkalde ang importansya sang preventive healthcare agud natapna sang temprano ang mga balatian antes maglala kag malikawan ang mas daku nga galastuhon sa pagbulong. Samtang, ginapadayon man sang iya administrasyon ang pagpauswag sang livelihood programs agud masiguro nga nagahatag ini sang padayon nga benepisyo sa mga benepisyaryo.
Ginpasalamatan ni Araquil ang provincial government kag ang iban pa nga nagbulig sa pagpatuman sang mga proyekto, kag ginpasalig nga ipadayon ang mga programa sang nagligad nga administrasyon samtang ginapaayo ang mga aspeto nga kinahanglan pa sang pagpauswag.
