Ginpahayag sang Department of Information and Communications Technology (DICT) South Cotabato ang importansya sang responsable kag mahinalongon nga paggamit sang online platforms, ilabi na sa pagproteher sang seguridad sang mga kabataan sa digital nga kalibutan.
Suno kay Ronald Jones Hinay, Provincial Officer sang DICT South Cotabato, indi dapat kabigon nga kaaway sang publiko ang teknolohiya bangod gintuga ini para sa lehitimo nga mga katuyuan, lakip ang entertainment, gaming, creativity kag social interaction.
Apang, ginpaathag ni Hinay nga nagatuhaw ang problema kon ang mga plataporma pareho sang Roblox kag iban pa nga online communication channels ginapahimuslan sang mga indibidwal nga may malain nga intensyon.
Bangud sini, padayon nga ginapalapnag sang ahensya ang cybersecurity awareness paagi sa mga aktibidad kag training agud mapataas ang kaalam sang publiko sa husto kag luwas nga paggamit sang teknolohiya.
Dugang pa ni Hinay, indi katuyuan sang DICT nga pahadlukan ang mga user ukon kabigon nga peligroso ang tanan nga technology platforms, kundi hatagan sila sang nagakaigo nga kaalam agud malikawan ang online abuse kag iban pa nga pagpang-abuso.
Gani, ginpahanumdom niya ang publiko nga mangin responsable sa paggamit sang online platforms, proteheran ang personal nga impormasyon, kag maghimo sang nagakaigo nga tikang agud masiguro ang kaluwasan sang mga kabataan online.
