Ginpahayag ni Prosecution Spokesperson Robert Barbers nga indi dapat kabugon nga political manipulation ang isyu bahin sa ginalegar nga mga kwarta halin China nga nagsulod sa isa ka kompanya nga nalambigit sa pamilya ni Vice President Sara Duterte.
Ini ang reaksiyon ni Barbers matapos ginatawag sang Chinese Embassy nga “false narrative” kag “fabricated” ang mga alegasyon ni anay senador Antonio Trillanes IV parte sa ginalegar nga pondo halin China.
Suno kay Barbers, ang mga rekord kag dokumento mismo ang magapakita kon may mga kwarta nga halin China nga nagsulod sa Calle 88 Foods Corporation, isa ka kompanya nga nalambigit sa bana sang bise presidente nga si Manases Carpio.
Sa ginpatigayon nga impeachment proceedings, ginpamatuod sang Anti-Money Laundering Council Executive Director Ronel Buenaventura nga nakabaton ang Calle 88 sang kapin P319.3 milyon nga inward remittances halin China kag Hong Kong, base sa covered transaction reports kag suspicious transaction reports sang AMLC.
Ginpahayag ni Barbers nga may yara sang AMLC records nga may kaangtanan sa amo nga mga transaksiyon kag ini ang dapat usisaon sa proseso sang impeachment.
Sa pihak nga bahin, ginpanginwala sang Chinese Embassy ang alegasyon nga ang China naghatag sang pondo sa isa ka political faction sa Pilipinas kag gintawag ini nga “false narrative.”
Nagapadayon naman ang pagtalakay sang Senate impeachment court sa AMLC records kag iban pa nga financial documents bilang bahin sang pag-usisa sa mga alegasyon batok kay Vice President Duterte.
