Mas naghugot ang mga awtoridad angot sa seguridad sa Bangsamoro Autonomous Region in Muslim Mindanao ukon BARMM bangud sa nagahilapit nga parliamentary elections.
Suno kay Philippine National Police Public Information Office chief Police Colonel Allen Rae Co, ginpatuman na ang full alert status sa Bangsamoro Region sang udto sang Setyembre 11 kag magapadayon ini tubtob Setyembre 30.
Sa idalom sang full alert status, kinahanglan nga 100 porsyento sang mga pulis yara sa ila tagsa-tagsa ka assignment area agud magpatuman sang seguridad kag magmonitor sang sitwasyon.
Naglab-ot sa 10,439 ka mga pulis ang gin-deploy sa rehiyon para sa seguridad sang eleksyon.
Padayon man ang ila pagbantay kag pagtipon sang impormasyon parte sa mga grupo ukon indibidwal nga posible maghimo sang kagamo ukon pagpalapta sang kagamo sa tion sang eleksyon.
Sa karon, may 27 ka lugar sa BARMM nga yara sa idalom sang red category.
Ini nagalakip sang 21 ka lugar sa Lanao del Sur, tatlo sa Maguindanao del Sur, kag tig-isa sa Maguindanao del Norte, Basilan kag Special Geographic Area.
