Binago ng House prosecution ang taktika nito sa impeachment trial ni Vice President Sara Duterte matapos hindi na maisalang sa witness stand ang Department of Education (DepEd) Special Disbursing Officer na si Edward Fajarda dahil sa kaniyang kondisyon sa kalusugan.
Ayon kay House prosecutor Rep. Joel Chua, hindi pa posible ang pagharap ni Fajarda sa Senate impeachment court matapos siyang atasan ng doktor na magpahinga nang 30 araw kasunod ng stroke na naranasan niya noong huling bahagi ng Agosto.
Dahil dito, nagpasya ang prosecution na unahin ang testimonya ng kinatawan ng Philippine Statistics Authority (PSA) habang ginagamit ang mga napagkasunduang facts sa pagitan ng magkabilang panig upang mailahad ang papel ni Fajarda sa paggamit ng confidential funds ng DepEd.
Sa pamamagitan ng stipulation, kinilala ng depensa na si Fajarda ang itinalaga ni Duterte bilang Special Disbursing Officer para sa confidential funds ng DepEd noong 2023 at siya rin ang nag-encash ng tatlong tseke na may kabuuang halagang P112.5 milyon.
Gayunman, nanatiling may hindi pagkakasundo ang prosecution at depensa sa eksaktong terminong gagamitin sa paglipat ng pera kay Col. Dennis Nolasco. Hindi nagkasundo ang dalawang panig kung ito ay dapat ilarawan bilang “disbursed.”
Sa halip, tinanggap ng impeachment court, sa panukala ni Presiding Officer Francis “Chiz” Escudero, ang stipulation na “natanggap” ni Nolasco ang naturang pondo.
Sa kabila ng hindi pagharap ni Fajarda, iginiit ng prosecution na malaking bahagi ng impormasyong nais nitong mailahad tungkol sa kaniyang papel ay maaari pa ring gamitin sa paglilitis sa pamamagitan ng mga facts na tinanggap ng depensa.
