Gintumod sang isa ka propesor ang importante nga papel sang media sa pagpaathag sa publiko sang nagapadayon nga impeachment trial batok kay Vice President Sara Duterte.
Sa interview sang Bombo Radyo Koronadal kay Prof. Danilo Arao sang University of the Philippines–Diliman, Department of Journalism, iya ginpahayag nga kinahanglan padayon kag aktibo ang coverage sang media agud mas maintindihan sang ordinaryo nga mga Pilipino ang mga nagakatabo sa impeachment court.
Ginkwestiyon niya ang naganubo nga atensyon sang media sa proceedings, ilabi na bangud madamo nga legalistic nga diskusyon nga mahimo mabudlayan intindihon sang publiko.
Ginpahayag niya nga dapat buligan sang media nga himuon nga mas klaro kag mas accessible sa publiko ang mga legal nga termino kag desisyon nga nagaguwa sa trial.
Ginpaklaro man ni Arao nga ang “sub judice” wala nagapugong sa media kag publiko nga magtalakay ukon maghatag sang opinyon bahin sa impeachment proceedings.
Suno sa iya, ang paglikaw sa pagkomento nagapatuhoy sa mga abogado nga direkta nga involved sa kaso kag mahimo man sa mga senator-judges.
Gani, ginpanawagan ni Arao nga indi maghipos ang media kag publiko, kundi padayon nga magbantay, magreport kag magtalakay sang impeachment trial agud mapalapad ang paghangop sang publiko sa proseso.
