Indi lamang pisikal nga seguridad ang dapat tutukan sa mga buluthuan, kundi pati ang mental kag emosyonal nga kaayuhan sang mga estudyante.
Ini ang nangin pahayag ni Teacher Adrian Pete Pregonir sa interview sang Bombo Radyo Koronadal.
Suno kay Pregonir, ang paglikaw sa kalakasan sa mga eskwelahan kinahanglan mangin kolektibo nga responsibilidad sang mga ginikanan, manunudlo, school authorities kag gobyerno.
Suno sa iya, dako ang papel sang mga ginikanan sa paggiya sa ila mga kabataan, ilabi na sa pagmonitor sang ila exposure sa internet kag social media nga mahimo makaimpluwensya sa ila pamatasan.
Apang ginpabug-atan ni Pregonir nga indi dapat matapos sa security measures ang tikang sang mga buluthuan.
Kinahanglan man sang padayon nga polisiya, pondo kag suporta agud mangin mas luwas ang mga buluthuan.
Ginpahayag man niya nga kinahanglan hatagan sang psychological kag emotional support ang mga estudyante nga nakaagi sang kalakasan, bangod mahimo ini magresulta sa trauma nga magapadayon sa malawig nga tion.
Bangud sini, nagpanawagan si Pregonir sa tanan nga sektor nga magbinuligay sa paghimo sang mga buluthuan nga tinuod nga “peace zone” para sa mga kabataan.
