Ginmanduan sang Philippine National Police (PNP) ang mga police commander sa bug-os nga pungsod nga hugton ang pagtuman sa husto nga waste segregation kag disposal bilang bahin sang pagresponder sang gobyerno sa nagalala nga problema sa basura.Suno kay PNP chief Police Gen. Jose Melencio Nartatez Jr., dapat mangin halimbawa ang mga pulis sa pagpabilin sang katinlo sa ila mga opisina kag komunidad.
Suno sa iya, dapat magsugod mismo sa mga police office kag unit ang husto nga paghaboy kag pagsegregar sang basura.Sakop sang direktiba ang tanan nga police office kag unit, kalakip ang mga precinct, police station, municipal kag city police station.Ginmanduan ang mga commander nga siguruhon nga may separado nga basurahan para sa biodegradable kag non-biodegradable waste.
Ginsiling sang PNP nga pagasuportahan sini ang panawagan nanday Pangulong Ferdinand Marcos Jr. kag Interior Secretary Jonvic Remulla para sa mas hugot nga pagpatuman sang mga tikang batok sa problema sa basura.Samtang, nagpangako si Nartatez nga magabulig ang PNP sa mga lokal nga gobyerno sa pagpatuman sang mga ordinansa kaangot sa husto nga paghaboy sang basura.
