Nagdangat na sa walo ka indibidwal ang napatay bangud sa epekto sang Habagat kag mga nagligad nga bagyo nga Luis kag Maymay, suno sa pinakabag-o nga datos sang National Disaster Risk Reduction and Management Council (NDRRMC).
Napatay ang duha sa Rizal bangud sa rockslide, duha sa Batangas bangud sa pagkalumos kag electrocution, duha sa Benguet bangud sa landslide, kag duha sa La Union bangud sa landslide, electrocution kag pagkalumos.
Ginapangita man ang isa ka tawo sa Batangas, samtang pito ang napilasan sa Benguet bangud sa landslide kag aksidente sa salakyan.
Samtang, nagapadayon ang pagbaha sa Ilocos Region, Central Luzon, MIMAROPA, CAR kag CALABARZON bangud sa mabaskog nga pag-ulan.
Nag-abot sa 2nd alarm ang Marikina River antes mag-alas-11 sang aga, nga nagtuga sa pagbakwit sang mga residente malapit sa sapa.
Masobra naman sa 400 ang yara sa evacuation center sa Concepcion Integrated School. Ginpahayag ni Marikina 1st District Representative Marcy Teodoro nga wala suno pa nag-operate ang Tumana Pumping Station, gani wala gilayon naagyan ang tubig-baha pakadto sa Pasig River.
Naguba kag gin-anod man sang tubig ang isa ka bahin sang Beckel Road sa La Trinidad, Benguet bangud sa soil erosion.
Naapektuhan sang malain nga panahon ang masobra 124,000 ka pamilya sa bug-os nga pungsod.
Mga 2,500 ka pamilya ang yara sa evacuation centers, samtang 170 ka balay ang naguba ukon napinsala kag 13 ang lubos nga naguba.
