Ginkuwestyon ni Senator-Judge Robin Padilla ang kahibalo ni state auditor Roderick Wamil sa terorismo kag nasyonal nga seguridad sa impeachment trial ni Vice President Sara Duterte.
Nagpaidalom bilang testigo si anay State Audit Roderick Wamil sang COA Intelligence and Confidential Funds Audit Office, bahin sa audit findings sang confidential funds sang Office of the Vice President (OVP).
Ginpamangkot siya ni Padilla kun nakaabot na siya sa BARMM, Bicol Region, kag mga malayo nga bahin sang Mindanao, nga iya ginsabat nga nakaabot siya sa pila ka kabukiran apang wala pa personal nga nakaaeksperyensya sang mga kahimtangan nga ginmentionar sang senador.
Gin-usisa man sang senador kun pamilyar si Wamil sa ISIS, Abu Sayyaf, kag New People’s Army (NPA), kag nagsabat si Wamil nga sa mga balita lamang niya nabal-an ang mga ini.
Bangud sini, ginpaklaro ni Wamil nga ang katungdanan sang COA indi imbestigasyon sa baylo pagsusi kun nagsunod ang mga ahensya sa mga patakaran sa pagliquidate kag pagreport sang confidential funds.
Gindugang pa niya nga ang Audit Observation Memorandum kabahin pa lang sang preliminary stage sang audit kag indi pa amo ang pinal nga findings.
Ginpabug-at ni Padilla ang importansya sang confidential funds kag confidential agents sa pagsabat sa mga pamahog sa seguridad.
Nagsabat naman si Wamil nga ang kinahanglanon sang confidential funds nagadepende sa mandato sang tagsa ka ahensya sang gobyerno.
