Ginpasiguro ni South Cotabato Governor Reynaldo Tamayo Jr. sa publiko nga madayon ang plano sang probinsya nga mag-angkat sang 30 milyon ka litro sang gatong agud makabulig sa pagpanubo sang presyo sang petrolyo.
Suno kay Tamayo, ginahulat na lamang sang provincial government ang bill of needing, isa ka importante nga dokumento sa pagpadala sang kargamento, antes mapatuman ang direkta nga pag-import sang gatong halin sa iban nga pungsod.Ginpahayag man sang gobernador nga samtang ginahulat ang amo nga dokumento, ginapadayon sang provincial government ang pagpatukod sang mga imprastruktura agod mapalig-on ang serbisyo sang nagkalain-lain nga sektor kag mga ahensya sang gobyerno sa probinsya.
Gindugang ni Tamayo nga mga 20 porsyento pa lamang sang mga proyekto ang nahuman, apang ginatinguhaan sang iya administrasyon nga madugangan ini sa 75 porsyento antes matapos ang tuig 2026.
Ginpasalig sang gobernador nga padayon ang pagpatuman sang mga programa kag proyekto nga nagatuyo sa pagpalambo sang ekonomiya kag paghatag sang mas maayo nga serbisyo sa katawhan sang South Cotabato.
