Ginabantayan sang mga otoridad ang kahimtangan sang industriya sang tilapia sa Lake Sebu, South Cotabato matapos magumpisa ang epekto sang padayon nga pag-ulan dala sang habagat.
Sa interview sang Bombo Radyo Koronadla kay Lake Warden Jose Rudy Muyco, nagpatigayon sang emergency harvest ang isa ka fish cage operator matapos magkulang ang oxygen sa tubig, nga nagresulta sa pagkamatay sang masobra 200 ka kilo nga tilapia.
Ginpahayag ni Muyco nga posible magluntad ang eutrophication sa Lake Sebu kun magpadayon ang mabaskog nga ulan.
Ini ang kondisyon nga nagadala sang kakulangan sang oxygen sa tubig kag pagdamo sang algae bloom nga mahimo magresulta sa fish kill.
Padayon naman ang cleanup operations sang lokal nga panguluhan, Project Management Office, kag mga fish cage operators agud matapna ang pagdamo sang algae kag water lilies nga nagabara sa agianan sang tubig.
Ginpaandaman ni Muyco nga posible maglala pa ang sitwasyon kon magpadayon ang ulan, apang ginpasiguro niya nga limitado pa ang natala nga fish kill kag yara pa sa kontrol ang kahimtangan.
Ginhambalan man niya ang publiko nga indi pagkaunon ang mga tilapia nga naglutaw na sa tubig bangod posible ini nga delikado sa panglawas.
