Masobra 11,000 ka mga security personnel ang ginapaabot nga ideploy sa rehiyon sang BARMM agud masiguro ang malinong kag matawhay nga pagpatigayon sang pinakauna nga Bangsamoro Parliamentary Elections sa Setyembre 14.
Sa interview sang Bombo Radyo Koronadal, ginpahayag ni Police Brigadier General Jemuel F. Siason, Deputy Regional Director for Administration sang Police Regional Office–BARMM, nga nakaperapar na ang masobra 8,000 ka pulis, samtang nag-request pa ang Police Regional Office–Bangsamoro Autonomous Region in Muslim Mindanao (PRO-BARMM) sang 3,000 ka dugang nga personnel halin sa Police Regional Offices 11, 12 kag 13.
Lakip man sa magabulig sa election security ang mga miyembro sang Special Action Force (SAF), Maritime Group, kag iban pa nga support units.
Suno kay Siason, padayon ang malapit nga koordinasyon sang PNP sa Commission on Elections (COMELEC), Armed Forces of the Philippines (AFP), Philippine Coast Guard (PCG) kag iban pa nga law enforcement agencies pinaagi sa sunod-sunod nga security planning meetings agud masiguro ang hapsay nga deployment kag pagpatuman sang election security plan.
Dugang pa niya, nagapabilin nga kontrolado ang sitwasyon sa rehiyon, bangud limitado pa lang ang mga na-monitor nga paglapas sa COMELEC gun ban.
Kalabanan sa mga kaso nagalakip sang boluntaryo nga pagturn-over sang armas kag mga nakumpiskar sa police checkpoints.
Gin-athag man ni Siason nga bisan may pila ka mga insidente sang pagpangluthang sa pila ka bahin sang BARMM, wala pa sang naitala nga election-related incident, bangud wala pa man nagsugod ang opisyal nga campaign period kag ang mga natabo ginakabig nga mga naglain-lain kag isolated nga kaso.
