Talakayon na sa madason nga semana ang mga kontrobersiyal nga ngalan nga ginaangot sa ginapaalegar nga maanomalya nga pagusar ni Vice President Sara Duterte sang iya confidential kag intelligence funds (CIF).
Suno kay House Prosecutor Terry Ridon, posible nga mabutyag liwat ang mga ngalan nga Mary Grace Piattos, Milky Sikuya, kag iban pa nga ginpahayag nga mga recipient sang intel funds sa pagtalakay sang Article I sang Articles of Impeachment.
Ginpahayag ni Ridon nga hugot ang preparasyon sang prosecution panel sa pagpresentar sang mga ebidensiya, lakip ang mga ulat sang Philippine Statistics Authority (PSA) nga magapakita kon may yara ukon wala sang opisyal nga rekord ang nasambit nga mga ngalan.
Madumduman nga una na nga ginpamatud-an sang PSA nga wala sa ila database kag wala man sang birth records para sa mga kontrobersiyal nga ngalan, nga una nga nagguwa sa mga acknowledgment receipts nga ginamit sa liquidation sang confidential funds sang Office of the Vice President (OVP) kag Department of Education (DepEd) sa idalom sang liderato ni VP Sara Duterte.
