Nagapadayon ang hulga sang mabaskog nga pag-ulan sa madamo nga bahin sang pungsod tubtob sa Martes, Hulyo 14, suno sa state weather bureau.
Base sa forecast sang Hulyo 11, maapektuhan ang dako nga bahin sang Pilipinas sang southwest monsoon ukon habagat nga magadala sang asod-asod nga pag-ulan.
Ginalauman ang mabaskog nga ulan nga 100 tubtob 200 millimeters sa Zambales, Bataan, kag Occidental Mindoro halin Hulyo 11 tubtob 14.
Samtang ang iban nga lugar lakip ang Metro Manila, Rizal, Cavite, Laguna, Batangas, Palawan, kag pila pa ka probinsya sa Luzon kag Visayas mahimo makabaton sang 50 tubtob 100 millimeters nga ulan sa amo nga panahon.
Nagpaandam ang weather bureau nga bangud sa padayon nga pag-ulan sa nagligad nga mga inadlaw, posible ini magresulta sa masangkad nga pagbaha kag pagguho sang duta sa apektado nga mga lugar.
