Ginbasura sang Korte Suprema ang petisyon nga nagapangayo nga kanselahon ang desisyon sang COMELEC Political Finance and Affairs Department (PFAD) may kaangtanan sa P30 milyon nga campaign donation nga nabaton ni Senador Francis Escudero sang 2022 elections.
Suno sa resolusyon sang Korte Suprema, ginbasura ang petisyon ni John Barry Tayam bangud indi husto ang legal nga remedyo nga iya gin-gamit.
Nag-ugat ang kaso matapos untaton sang PFAD ang imbestigasyon batok kay Escudero kag Lawrene Lubiano sang Centerways Construction and Development Incorporated bangud wala sang igo nga ebidensya sa ginapahayag nga paglapas sa election law.
Gin-ako ni Escudero nga nakabaton siya sang donasyon halin kay Lubiano, apang ginpahayag niya nga wala siya sang kabahin sa pagkuha sang mga proyekto sang Centerways halin sa gobyerno.
Suno sa PFAD, separado ang personalidad ni Lubiano kag sang kumpanya, kag wala sang pamatuod nga ang donasyon naghalin sa pondo sang Centerways.
