Nagpangayo sang pasaylo ang Philippine drag queen nga si Maxie Andreison matapos nag-viral liwat ang isa ka video nga nagapakita sa iya nga nalakip sa pagpanakit sa isa ka fan nga miyembro man sang LGBTQIA+ community sang tatlo ka tuig ang nagligad.
Sa iya ginpakigbahin nga video sa social media, gin-ako ni Maxie ang iya sala kag nagpahayag sang paghinulsol sa natabo.
Gin-ako man niya nga indi husto ang pagpanakit sa bisan ano nga sitwasyon kag ginpabutyag nga nagkaistoryahanay kag nagpasaylohanay na ang duha ka kampo pagkatapos sang insidente.
Sa naglapta nga video, makit-an nga gintapungol kag ginsipa ni Maxie ang isa ka indibidwal nga wala nagbalos.
Suno sa naglapta nga mga pahayag online, nag-umpisa ang insidente matapos aksidente nga mabutong sang isa ka hubog nga fan ang wig ni Maxie pagkatapos sang iya performance sa isa ka bar.
Wala naman gintalakay ni Maxie ang ginhalinan sang insidente sa iya apology video kag sa baylo gin-ako niya ang responsibilidad sa iya mga binuhatan kag liwat nga nagpangayo sang pasaylo sa iya mga tagasuporta.
Sa karon, wala pa sang opisyal nga pahayag ang pihak nga kampo may kaangtanan sa insidente.
