Ginabulubanta nga ara sa 65% ang mga puno nga napatubo sang syudad sang Koronadal sa serye sang tree growing activities nga napatigayon sini sa sulod sang masobra isa ka dekada nga serye sang pagtanom.
Ini ang kabahin sang pahayag ni Koronadal City Environment and Natural Resources Officer Augustus Bretaña sa ekslusibo nga interview sang Bombo Radyo Koronadal.
Suno sa iya, humalin sang nag-umpisa ang syudad sa pagpatigayon sang tree planting kag tree growing festival humalin pa sang 2011 tubtub sa subong nga tuig 2026 ukon sa sulod san 16 ka tuig , madinalag-on na nga nagtubo ang 65% sang mga puno sang kahoy sa mga upland areas sa syudad sa diin nalakip ang mga barangay sang Carpenter Hill, Esperanza, Mabini, Cacub, kag Topland.
Apang sa pihak sang nasambit nga mga serye sang pagpatubo sang mga puno kag pag-amlig sa kina-iyahan, isa sa mga pagpanghangkat sa subong nga ginapangatubang sang syudad amu ang serye sang illegal nga mga aktibidad nga naga apekto sang pag tubo sang mga puno parehas sang kaingin farming kag illegal logging.
Ginpasiguro man sini nga kasamtangan na nga ginatap sang Koronadal CENRO ang mga community extension officer sa mga upland areas para ma mitigate ang kaingin kag iban pa nga mga aktibidad nga makaguba sa kina-iyahan.
Nagapanawagan naman ini sa tanan nga magbulig sa pag-amlig sa kina-iyahan bangud inter-generational ini nga responsibilidad agud nga mapanalipdan ang ikaayo sang mga pumuluyo pinaagi sa pag amlig sa kina-iyahan
